Ғылыми-зерттеу қызметі
Ғылымды дамыту – озық шешімдерді енгізу
Жобаның атауы
Цифрлық платформаны пайдалану арқылы емтихан материалдарының сапасын арттыру
Ғылыми жетекшісі: Н.А. Дидарбекова
Кезеңі: 2025
Жоба Ұлттық тестілеу орталығы үшін бірыңғай инновациялық цифрлық ортаны құруға және енгізуге бағытталған. Негізгі идея – тест тапсырмаларын әртүрлі операциялық жүйелер мен бағдарламаларда (мысалы, MS Word) шашыраңқы түрде әзірлеуден, емтихан материалдарының толық өмірлік циклін: құрастыру мен сараптамадан бастап, апробациялау мен психометриялық талдауға дейін орталықтандырылған басқаруға көшу.
Жобаның мақсаты: Мамандандырылған цифрлық платформаны енгізу және заманауи статистикалық әдістерді қолдана отырып, тесттерді қалыптастыру процестерін автоматтандыру арқылы емтихан материалдарының сапасын, сенімділігін және валидтілігін арттыру.
Негізгі міндеттер:
- Тест әзірлеуге арналған цифрлық платформаларды қолданудың халықаралық және отандық тәжірибесін зерделеу (мысалы, AQA, ETS жүйелері).
- Тапсырмалар банкін басқару жүйесінің функционалын апробациялау, тапсырмаларды басқарудың цифрлық платформасы элементтерін ұлттық контекстке бейімдеу.
- Әзірлеуші мамандар мен сарапшылардың біліктілігін арттыру, сондай-ақ дәстүрлі тәсілмен салыстырғанда цифрлық тәсілдің тиімділігін талдау.
Ғылыми жаңалығы: Жобаның ғылыми жаңалығы – тест тапсырмаларын мәтіндік редакторларда қолмен құрастырудан QTI халықаралық стандарты негізінде емтихан материалдарының толық өмірлік циклін автоматтандыратын бірыңғай цифрлық экожүйеге көшу болып табылады.
Күтілетін нәтижелер:
Бірыңғай цифрлық орта: Бірыңғай цифрлық ортаны құруға қойылатын талаптар (тест тапсырмаларын әзірлеу мен сараптау процестерін стандарттауды қоса алғанда) тапсырмалардың қайталануын болдырмауға, метадеректер жүйесін қалыптастыруға (соның ішінде Блум таксономиясының деңгейлерін көрсетумен), сондай-ақ ақпараттық қауіпсіздік деңгейін арттыруға бағытталған.
Цифрлық ортада тапсырмаларды құрастыру және сараптау үшін технологиялық негіз бен кадрлық капиталды қалыптастыру.
Сапаны арттыру: Тесттердегі қателер санын азайту үшін тапсырмалардың интеллектуалды конструкторларын және сапаны автоматты бақылау құралдарын (мысалы, CheckerWord құралы) пайдалану.
Стандарттарға сәйкестік: Бағалау процедураларының ашықтығын қамтамасыз ету және ұлттық тестілеу жүйесін халықаралық талаптар мен стандарттарға (мысалы, QTI) сәйкес келтіру.
Ғылыми үлес: Халықаралық журналдарда мақалалар жариялау және Қазақстандағы тестілеудің нормативтік базасын жетілдіру бойынша ұсыныстар әзірлеу.