ҰЛТТЫҚ ТЕСТІЛЕУ ОРТАЛЫҒЫ БІЛІМ САПАСЫН БАҒАЛАУ САЛАСЫНДА ХАЛЫҚАРАЛЫҚ ЫНТЫМАҚТАСТЫҚТЫ КЕҢЕЙТУДЕ

2025 жылғы 20-31 қазан аралығында Ұлттық тестілеу орталығы білім сапасын бағалау саласындағы халықаралық ынтымақтастықты нығайту, психометрия саласындағы ғылыми зерттеулерді дамыту және ұлттық тестілеу жүйесін жетілдіру мақсатында халықаралық серіктестермен бірқатар кездесулер өткізді.

Аталған кезеңде Орталыққа жетекші шетелдік ұйымдардың өкілдері келді. Олардың қатарында – Educational Testing Service (ETS, АҚШ), AQA (Ұлыбритания), Өзбекстан Республикасы Министрлер Кабинеті жанындағы Мемлекеттік тестілеу орталығы, Әзербайжан Республикасының Мемлекеттік емтихан орталығы, сондай-ақ Ұлттық зерттеу университеті «Жоғары экономика мектебі» жанындағы Психометрика және білім беру өлшемдері орталығының (РФ) өкілдері болды.

20 қазанда AQA компаниясының өкілдері Вали Хусейн мен Конор Бирн тест тапсырмаларын әзірлеу мен талдау бойынша Grade Maker Pro платформасын пайдалану жөніндегі семинарды ұйымдастыру мәселелерін талқылаған жұмыс кездесуін өткізді.

21 қазанда Орталықта ETS ұйымының өкілдері – Патрик Кюленнен және Морис Коган-Хаукпен кездесу өтті. Қатысушылар Орталықтың негізгі бағыттарымен және жобаларымен танысты. Кездесу барысында Ұлттық тестілеу орталығы мен Educational Testing Service (ETS, АҚШ) арасындағы стратегиялық серіктестік мәселелері талқыланды.

23 қазанда Орталықта Өзбекстан, Әзербайжан, Ұлыбритания және Ресей Федерациясынан келген делегациялардың қатысуымен кеңейтілген кездесу өтті. Кездесу барысында психометрия, тесттердің сенімділігі мен валидтілігі салаларындағы бірлескен ғылыми жобаларды жүзеге асыру, тәжірибе алмасу және білім беру өлшемдерінің әдістемесін жетілдіру мәселелері қарастырылды.

24 қазанда Ұлттық зерттеу университеті «Жоғары экономика мектебі» (ЖЭМ, Ресей Федерациясы) жанындағы Психометрика және білім беру өлшемдері орталығының ғылыми жетекшісі Елена Кардановамен қорытынды кездесу өтті. Кездесу аясында Ұлттық тестілеу орталығы қызметкерлеріне «Білім берудегі R бағдарламалау тілі» атты 34 академиялық сағат көлеміндегі біліктілікті арттыру бағдарламасын сәтті аяқтағаны үшін ЖЭМ университетінің сертификаттары табысталды.

Сонымен қатар, 20–29 қазан аралығында Орталық қызметкерлері AQA Global Assessment Services (Ұлыбритания) халықаралық компаниясы ұйымдастырған біліктілікті арттыру курсын тәмамдады.
Бағдарлама заманауи бағалау рәсімдері бойынша оқытуды және тесттердің валидтілігі мен сенімділігін бағалау қағидаттарын, классикалық тестілеу теориясына (Classical Test Theory) негізделген талдау әдістерін, сондай-ақ тест контентін халықаралық стандарттармен (A-levels, Ұлыбритания) сәйкестендіру тәсілдерін қамтыды. Сабақтарды AQA сарапшылары – Ханна Роу (AlphaPlus компаниясының бағалау жөніндегі директорының орынбасары, AQA Global Assessment Services тобының бөлігі) және Вали Хусейн (AQA бағалау жөніндегі аймақтық сарапшысы) жүргізді. Курс соңында қатысушыларға кәсіби даму сертификаттары табысталды. Сонымен қатар, орталық қызметкерлері GradeMaker платформасында оқыту курсын сәтті аяқтады.

Бұдан бөлек, ҚР Ғылым және жоғары білім министрлігінің стратегиялық серіктестер форумы аясында ҰТО директоры Болатбек Абдрасилов пен ETS компаниясының директоры Амит Севак білім сапасын бағалау саласындағы стратегиялық серіктестік және ҰБТ модернизациясы бағытындағы бірлескен жұмыс мәселелерін талқылады. Білім беру өлшемдері саласындағы жаһандық көшбасшы ETS ұйымымен серіктестік тестілеу форматын жаңғыртуға және оны тек академиялық білімге ғана емес, сонымен қатар сәтті оқу мен кәсіби дамуда маңызды болып табылатын негізгі дағдыларға бағытталған тестке айналдыруға мүмкіндік береді.

Бүгінде Ұлттық тестілеу орталығы – Қазақстандағы білім жетістіктерін бағалау саласындағы жетекші ұйым. Орталық ұлттық тесттерді әзірлеу және өткізу жұмыстарымен қатар, психометрия саласында ғылыми зерттеулер жүргізеді, тест тапсырмаларының сенімділігі, валидтілігі мен объективтілігін зерттеуге ерекше назар аударады.

ETS, AQA, ЖЭМ халықаралық ұйымдармен, сондай-ақ бейіндік орталықтармен әріптестік – тәжірибе алмасу, инновациялық тәсілдерді енгізу және ұлттық бағалау жүйесін жетілдіру үшін жаңа мүмкіндіктер ашады.

Бірлескен жобалар мен ғылыми зерттеулер Қазақстанның білім беру саясатының мақсаттарына және халықаралық стандарттарға сай заманауи, ашық және ғылыми негізделген тестілеу жүйесін дамытуға ықпал етуде.